← ყველა სტატია

როგორ ჩავატაროთ გასაუბრება: კითხვები დამსაქმებლისთვის

გასაუბრების შემდეგ ხშირად რჩება შთაბეჭდილება და არა ფაქტები: „სასიამოვნო ადამიანია“. ქვემოთ აღწერილი მიდგომით კანდიდატებს ერთმანეთს ადარებთ იმის მიხედვით, რა გააკეთეს და როგორ, და არა იმის მიხედვით, ვინ უფრო თავდაჯერებულად ისაუბრა.

დაიწყეთ 15-წუთიანი ზარით

სანამ ოფისში დაპატიჟებთ, დაურეკეთ კანდიდატს. ჰკითხეთ, რატომ დააინტერესა ვაკანსიამ, რა ხელფასს ელის და როდის შეუძლია მუშაობის დაწყება. თუ პირობები არ ემთხვევა, ორივე მხარე ზოგავს დროს და გზას. ზარიდან ასევე ჩანს, როგორ საუბრობს ადამიანი, რაც კლიენტთან მომუშავე პოზიციებისთვის მნიშვნელოვანია.

დაუსვით ყველას ერთი და იგივე კითხვები

წინასწარ მოამზადეთ ხუთიდან რვამდე კითხვა და დაუსვით ისინი ყველა კანდიდატს ერთი და იმავე თანმიმდევრობით. ასე პასუხები ერთმანეთს ადარებთ და არა საუბრის ზოგად განწყობას. თითოეული პასუხი გასაუბრებისთანავე შეაფასეთ ხუთქულიან სკალაზე, სანამ ჯერ კიდევ გახსოვთ, რა თქვა ადამიანმა.

იკითხეთ, რა გააკეთა და არა რას გააკეთებდა

ჰიპოთეტურ კითხვაზე („რას გააკეთებდით, თუ…“) ყველა სწორ პასუხს იძლევა. წარსულ გამოცდილებაზე დასმული კითხვა უფრო მეტს ამბობს. რამდენიმე მაგალითი:

მომიყევით შემთხვევაზე, როცა უკმაყოფილო კლიენტთან მოგიწიათ საუბარი. რა გააკეთეთ და რით დასრულდა?

გაიხსენეთ ვადა, რომელსაც ვერ ასწრებდით. როგორ მოიქეცით?

რომელი სამუშაოთი ამაყობთ ყველაზე მეტად თქვენს ბოლო ადგილზე და რა იყო მასში თქვენი წვლილი?

როდის შეგიცვლიათ მიდგომა სხვისი შენიშვნის შემდეგ?

თუ პასუხი ზოგადია, დააზუსტეთ: „კონკრეტულად თქვენ რა გააკეთეთ?“

კითხვები, რომლებიც არ უნდა დასვათ

ნუ იკითხავთ ასაკს, ოჯახურ მდგომარეობას, შვილების ყოლის გეგმებს, რელიგიას, ეროვნებას ან ჯანმრთელობას. ამ კითხვებს სამუშაოსთან კავშირი არ აქვს და დისკრიმინაციულად აღიქმება. თუ სამუშაოს ფიზიკური მოთხოვნა ან კონკრეტული გრაფიკი აქვს, იკითხეთ პირდაპირ ის: „შეგიძლიათ შაბათობით მუშაობა?“

პრაქტიკული დავალება, თუ პოზიცია ამას მოითხოვს

დიზაინერისთვის, დეველოპერისთვის ან ბუღალტრისთვის მოკლე დავალება ხშირად ბევრად მეტს ამბობს, ვიდრე საუბარი. დავალება მოიფიქრეთ ისე, რომ ერთ საათზე მეტი არ დასჭირდეს, ან გადაიხადეთ დახარჯული დროის საფასური. თქვენი რეალური პროექტის უფასოდ შესრულება კანდიდატს არ სთხოვოთ.

დაასრულეთ შემდეგი ნაბიჯით

ბოლო ხუთი წუთი დაუთმეთ კანდიდატის კითხვებს: კარგი კანდიდატი ყოველთვის კითხულობს რაღაცას სამუშაოს შესახებ. დამშვიდობებისას უთხარით, როდის მიიღებს პასუხს, და ეს ვადა დაიცავით. შეთავაზების და უარის წერილის ნიმუშები იხილეთ გზამკვლევში „როგორ ვუპასუხოთ კანდიდატებს“.

ხშირად დასმული კითხვები

რამდენ ხანს უნდა გაგრძელდეს გასაუბრება?

პოზიციების უმეტესობისთვის 30-დან 45 წუთამდე. ამ დროში ასწრებთ ხუთიდან რვამდე კითხვას და კანდიდატის კითხვებს.

რამდენი ეტაპი სჭირდება შერჩევას?

ჩვეულებრივ საკმარისია სატელეფონო ზარი და ერთი გასაუბრება, საჭიროების შემთხვევაში მოკლე დავალებით. ყოველი დამატებითი ეტაპი ზრდის შანსს, რომ საუკეთესო კანდიდატი სხვა შეთავაზებას დათანხმდეს.

შეიძლება გასაუბრება ონლაინ ჩავატაროთ?

დიახ. ონლაინ გასაუბრებაზე იგივე წესები მოქმედებს: ერთნაირი კითხვები და შეფასება გასაუბრებისთანავე. წინასწარ გაუგზავნეთ კანდიდატს ბმული და დრო.

ჩემი HR: მიღებული CV-ები →

სხვა სტატიები